ԱՐՎԵՍՏԱՆՈՑ

Գաֆէսճեան պատանեկան խորուրդը ներկայացնում է նոր նախագիծ՝ ԱՐՎԵՍՏԱՆՈՑ:

Ի՞նչ է արվեստանոցը. փակ ներանձնային տարա՞ծք, որը պատկանում է միայն արվեստագետին, թե՞ «գործարան», որտեղ բյուրեղանում են ժամանակի միտքը և նյութը: 

«Արվեստանոց» լուսանկարչական նախագիծը ներկայացնում է ինը ֆոտոպատում տաս հայ ժամանակակից նկարիչների և նրանց արվեստանոցների մասին՝ բացահայտելով արվեստագետների «սրբազան տարածքը» Գաֆէսճեան պատանեկան խորհրդի անդամների աչքերով: Պատանի լուսանկարիչների տեսախցիկը վավերագրել է ճանաչված արվեստագետների անհայտ արվեստանոցային տարածքները՝ հրավիրելով դիտողին բացահայտելու ներկայացված արվեստագետների ստեղծագործական միջավայրի բազմազանությունը և պարզ հարաբերություններն այդ միջավայրի հետ:

«Արվեստանոց» նախագիծը մեկնարկել է 2017 թվականի օգոստոսին վավերագրական լուսանկարչության դասընթացով, որի շրջանակներում 4Պլյուս վավերագրական լուսանկարչության կենտրոնում պատանեկան խորհրդի տաս անդամները մասնակցել են Նազիկ Արմենակյանի պարապմունքներին, ծանոթացել լուսանկարչության պատմությանը, ձեռք բերել տեսական և գործնական գիտելիքներ, որին հաջորդել են արվեստանոցային այցերը և հանդիպումներն արվեստագետների հետ: 

Նախագծի մեջ ներգրավված արվեստագետներն են քանդակագործ Սահակ Պողոսյանը, նկարիչներ Ռոբերտ Էլիբեկյանը, Խաչատուր Մարտիրոսյանը, Մարինա Դիլանյանը, Նանա Արամյանը, Արման Գրիգորյանը, Սարգիս Համալբաշյանը, Մերի Մունը, Արևիկ Արևշատյանը և Ռուբեն Գրիգորյանը, ում արվեստանոցների շուրջ պատանիները ստեղծել են իրենց ֆոտոպատումները: 

Ներգրավելով պատանիներին և արվեստագետներին ստեղծագործական երկխոսության մեջ՝ «Արվեստանոց» նախագիծը դարձավ միջսերնդային ճանաչողության և համագործակցության ինքնատիպ հարթակ, որի արդյունք հանդիսացող ֆոտոպատումներն արտացոլում են այդ հարաբերությունների անմիջականությունն ու հուզական փորձառությունը: 

«Արվեստանոց» ցուցադրությունը ներկայացված է Կենտրոնի Շարժասանդուղքների սրահում՝ «Խանջյան պարտեզի», «Խանջյան» և «Սասունցի Դավիթ պարտեզի» հարթակներում: Ցուցադրությունը բաց կլինի 2018 թվականի փետրվարի 23-ից մինչև հունիսի 3-ը: 

Գաֆէսճեան պատանեկան խորհուրդը 13-16 տարեկան երիտասարդների առաջնորդական խումբ է, որը  ստեղծվել է 2017թ.՝ նպատակ ունենալով կառուցել շարունակական հարաբերություններ  պատանիների հետ, կարևորել նրանց բազմապիսի հետաքրքրությունները և կարիքները՝ Կենտրոնը դարձնելով սիրելի վայր բոլոր դեռահասների համար, ներգրավել նրանց մշակութային միջավայրի մեջ որպես ակտիվ դերակատարների, միևնույն ժամանակ խթանել նրանց ստեղծարար մտածողությունը և տեսողական գրագիտությունը, նպաստել հաղորդակցման, թիմային աշխատանքի և առաջնորդական հմտությունների զարգացմանը:

Ծրագրի հովանավորն էր Beeline ընկերությունը: