«Գաֆէսճեան ընտանիք» հիմնադրամի նախագահ տիկին Քեթլին Գաֆէսճեան-Բարադարանը պարգևատրվել է ՀՀ մշակույթի նախարարության ոսկե մեդալով
Թանգարանների միջազգային օրվան ընդառաջ՝ մայիսի 17-ին, ՀՀ մշակույթի նախարարությունը Գաֆէսճեան արվեստի կենտրոնի տասնամյակի կապակցությամբ հաճելի անակնկալ մատուցեց Կենտրոնին՝ թանգարանային գործում զգալի ավանդի համար «Գաֆէսճեան ընտանիք» հիմնադրամի նախագահ տիկին Քեթլին Գաֆէսճեան-Բարադարանին պարգևատրելով ՀՀ մշակույթի նախարարության ոսկե մեդալով:
Մեդալը հանձնվեց Կենտրոնի գործադիր տնօրենի պաշտոնակատար Վահագն Մարաբյանին, ով խորին շնորհակալություն հայտնեց ՀՀ մշակույթի նախարարությանը՝ Կենտրոնի գործունեությունն ու Տիկին Բարադարանի ավանդը բարձր գնահատելու համար:
ՀՀ մշակույթի նախարարի պաշտոնակատար Տիգրան Գալստյանը շնորհավորական ուղերձ հղեց Կենտրոնի տասնամյակի կապակցությամբ և բնութագրեց այն որպես ծրագրերի և գործունեության օրինակելի չափանիշներով աչքի ընկնող մշակութային օջախ: